Əhali arasında “Ceyhun xanım və Hacı Əhməd” məscidi kimi tanınan Ceyranbatan məscidi eyni adlı qəsəbədə yerləşir. Məscid Türkiyə Diyanət Vəqfinin və türk iş adamlarının maddi köməyi ilə 1997-1998-ci illərdə inşa edilmişdir. Məscid binasının ümumi daxili sahəsi 225 kv. metrdir. Hündürlüyü 30 metrə çatan minarəsi bişmiş kərpicdən tikilmişdir.

Bakı və Sumqayıt şəhərlərinin arasında yerləşən, 1959-cu ildə şəhər tipli qəsəbə statusu alan Ceyranbatan 1955-ci ildə eyni adlı nəhəng su anbarının tikilməsi ilə əlaqədar salınmışdır. Lakin həm Sumqayıtın, həm də Ceyranbatanın tarixi ötən əsrin ortalarından çox-çox əvvəllərə gedib çıxır. Hətta rəvayətə görə, sevgilisinin düşmənlərlə döyüşdə həlak olmasından sarsılmış Ceyran adlı gözəl qız “Sum, qayıt”, - deyə onu çağıra-çağıra gəlib özünü buradakı gölə atır. O vaxtdan gölün adı “Ceyranbatan”, yaxınlıqdakı obanın adı isə “Sumqayıt” adlandırılır. Gerçək tarixdən isə məlumdur ki, karvan, yəni İpək yolunun üstündə məntəqə olan bu yerlər lap qədim dövrlərdən yaşayış məskəni imiş.