Press-relizlər / 24.02.2020 / 12:32

Fevralın 23-də Sumqayıt şəhərində Xocalı soyqırımının qurbanları yad edilib. Tədbirdə Qafqaz Müsəlmanları İdarəsinin bölgə qazısı Rauf Sərdarov, Dini Qurumlarla İş üzrə Dövlət Komitəsinin Sumqayıt bölgəsi üzrə şöbəsinin müdiri Yalçın Abdullayev, şöbənin əməkdaşları, Sumqayıt yəhudiləri dini icmasının sədri Boris Mixailovic Trepner, Həyat Sözü-2 dini icması və Sumqayıt yəhudiləri dini icmasının nümayəndələri iştirak ediblər.

Tədbirdə vurğulanıb ki, 1992-ci ilin fevral ayında Xocalının azərbaycanlı əhalisinə qarşı misli görülməmiş soyqırımı törədilib. Xocalı Soyqırımı kimi tanınan bu qanlı faciə nəticəsində minlərlə azərbaycanlı öldürülmüş və əsir götürülmüş, şəhər özü yerlə-yeksan edilib. Bildirilib ki, Xocalının yüzlərlə günahsız sakininin vəhşicəsinə qətlə yetirilməsi Azərbaycan Respublikasının Dağlıq Qarabağ bölgəsi ərazisində baş verən silahlı münaqişə zamanı törədilmiş ən qanlı cinayətlərdən biri idi. Ermənistan silahlı qüvvələri və xarici hərbi birləşmələr Xocalıdan və ətraf yerlərdən çıxa bilməmiş insanların demək olar ki, hamısını vəhşicəsinə qətlə yetiriblər.