Press-relizlər / 28.11.2019 / 14:49
Noyabrın 28-də Dini Qurumlarla İş üzrə Dövlət Komitəsinin (DQİDK) Masallı bölgəsi üzrə şöbəsi və Masallı Rayon Polis Şöbəsinin (RPŞ) birgə təşkilatçılığı ilə Məhəmməd Qarayev adına Masallı rayon Sığıncaq kənd tam orta məktəbində “Dini radikalizm və onunla mübarizə yolları” mövzusunda tədbir keçirilib.
Tədbirdə DQİDK-nın Masallı bölgəsi üzrə şöbəsinin müdiri Miryəhya Bədirov, Masallı RPŞ-nin rəisi, polis polkovniki Habil Əmiraslanov, Masallı Rayon İcra Hakimiyyəti başçısının Təklə ərazi inzibati dairəsi üzrə nümayəndəsi Oktay Tağıyev, Sığıncaq kənd tam orta məktəbinin direktoru Əhliman Əliyev, valideynlər və şagirdlər iştirak ediblər.
Çıxışlarda qeyri-ənənəvi dini cərəyanlar və dini radikalizm barədə ətraflı məlumat verilərək bu cür halların yaranma səbəbləri və təbliğatına qarşı mübarizə yollarından geniş bəhs edilib. Vurğulanıb ki, radikalizmi doğuran başlıca səbəblərdən biri İslam dini haqqında məlumatsızlıq, dini bilgilərin zəif olmasıdır. Ona görə də dini radikalizmlə mübarizədə ilk növbədə dini maarifçilik işinin təşkilinə xüsusi önəm verilməlidir. Tədbirdə həmçinin şəhidlik, Vətən anlayışı, dinimizin Vətən uğrunda mübarizəyə verdiyi dəyərlər barədə danışılıb.
Tədbir iştirakçıların təklif, sual və müraciətləri ilə qarşılıqlı diskussiya şəraitində keçirilib.
