Press-relizlər / 31.10.2017 / 17:28
Oktyabrın 31-də Zaqatala Rayon İcra Hakimiyyəti (RİH), Dini Qurumlarla İş üzrə Dövlət Komitəsinin (DQİDK) Zaqatala bölgəsi üzrə şöbəsi və Zaqatala Rayon Təhsil Şöbəsinin birgə təşkilatçılığı ilə Zaqatala rayonu Üçüncü Tala kənd tam orta məktəbində “Azərbaycan gəncliyi: dünən, bu gün, sabah” adlı tədbir təşkil olunub.
Yuxarı sinif şagirdləri və müəllimlərin iştirak etdiyi tədbiri giriş sözü ilə açan məktəbin direktoru Alimə Qurbanova müasir gəncliyin müxtəlif istiqamətlərdə maariflənməsinin əhəmiyyətindən danışıb.
Zaqatala RİH başçısı Aparatının İctimai-siyasi və humanitar məsələlər şöbəsinin müdir müavini-dini qurumlarla işin təşkilatçısı İlqar Vəliyev milli-mənəvi dəyərlərin qorunmasının vacibliyindən, milli dəyərlərimizə qarşı yönələn yad ünsürlərlə mübarizənin əhəmiyyətindən bəhs edib.
DQİDK-nın Zaqatala bölgəsi üzrə şöbəsinin əməkdaşı Sərxan Tahirzadə isə gənc nəslin sağlam ruhda yetişdirilməsinin zəruri məsələ olduğunu qeyd edib. O vurğulayıb ki, hər birimiz milli-mənəvi dəyərlərin daşıyıcısı o cümlədən onun qoruyucusu olmalıyıq.
Zaqatala RTŞ-nın əməkdaşı Günəş Əsgərova təhsilin dini radikalizmlə mübarizədəki vacib rolundan, Azərbaycan maarifçilərinin 19-cu əsrdə dini mövhumata, fanatizmə və dini xurafata qarşı apardığı mübarizədən bəhs edərək, bildirib ki, şagirdlərin bu barədə geniş məlumatlara yiyələnmələri mühüm əhəmiyyət kəsb edir.
Tədbirin sonunda iştirakçıları maraqlandıran suallar cavablandırılıb.
.JPG)
