%20(1)(1).JPG&w=1200)
Press-relizlər / 31.10.2017 / 16:50
Oktyabrın 31-də Dini Qurumlarla İş üzrə Dövlət Komitəsi (DQİDK) və Nəsimi Rayon İcra Hakimiyyətinin (RİH) birgə təşkilatçılığı ilə Bakı Slavyan Universitetinin (BSU) nəzdində fəaliyyət göstərən Məktəb-lisey kompleksində “Uşaq hüquqları aylığı” çərçivəsində “Uşaq hüquqlarının qorunması milli-mənəvi dəyərlərimizin tərkib hissəsi kimi” mövzusunda tədbir keçirilib.
Tədbirdə DQİDK-nın Bakı şəhəri üzrə şöbəsinin əməkdaşları Faiq Ələkbərov, Pərvin Nuriyeva, Nəsimi RİH başçısı Aparatının İctimai-siyasi və humanitar məsələlər şöbəsinin müdir müavini-dini qurumlarla işin təşkilatçısı Rauf İsgəndərov və şöbənin əməkdaşı Orxan Əzizov, məktəb-lisey kompleksinin direktoru İlahə Carçıyeva, kompleksin pedaqoji kollektivi və şagirdlər iştirak ediblər.
Tədbiri giriş sözü ilə açan BSU Məktəb-lisey kompleksinin direktoru İlahə Carçıyeva uşaq hüquqları mövzusunda beynəlxalq təcrübə haqqında qısaca məlumat verib və bu cür tədbirlərin mütəmadi həyata keçirilməsinin əhəmiyyətini qeyd edib.
Dövlət Komitəsinin Bakı şəhəri üzrə şöbəsinin əməkdaşı Faiq Ələkbərov dövlətçilik ənənələrinin formalaşmasında milli-mənəvi dəyərlərimizin rolu haqqında söhbət açıb. F.Ələkbərov ölkəmizdəki sabitliyin və əmin-amanlığın qorunmasında milli dəyərlərə bağlılığın zəruri əhəmiyyət kəsb etdiyini vurğulayıb.
DQİDK-nın Bakı şəhəri üzrə şöbəsinin əməkdaşı Pərvin Nuriyeva uşaq hüquqlarının qorunmasının milli-mənəvi dəyərlərimizdəki yeri və rolu ilə bağlı ətraflı məruzə ilə çıxış edib. P.Nuriyeva uşaqlara qayğının, onların hüquqlarının təmin edilməsinin hər bir ictimai institutun mühüm vəzifəsi olduğunu tədbir iştirakçılarının diqqətinə çatdırıb.
Daha sonra Dövlət Komitəsinin sifarişi əsasında çəkilmiş “Şəhadət” sənədli filmi nümayiş etdirilib.
Tədbirin sonunda iştirakçıları maraqlandıran suallar cavablandırılıb.
