Press-relizlər / 25.04.2022 / 09:30

“Xilaskar” Yevangelik-lüteran kilsəsində xristian dini icmaları Pasxa bayramını qeyd ediblər. 

Tədbirdə çıxış edən Dini Qurumlarla İş üzrə Dövlət Komitəsi sədrinin müavini Səyavuş Heydərov dini icma nümayəndələrini bayram münasibətilə təbrik edib.

Komitə sədrinin müavini vurğulayıb ki, Ulu Öndər Heydər Əliyevin əsasını qoyduğu multikultural ənənələrin qorunması və inkişaf etdirilməsi siyasəti bu gün Prezident İlham Əliyev tərəfindən uğurla davam etdirilir. Səyavuş Heydərov qeyd edib ki, respublikamız müxtəlif dinlərin və xalqların nümayəndələrinin sülh, əmin-amanlıq və qardaşlıq şəraitində yaşadığı bir ölkədir. Azərbaycanın multikultural və tolerantlıq siyasəti bu gün dünyaya bir nümunədir.

Azərbaycan “Bibliya” Cəmiyyətinin sədri Rasim Xəlilov ölkəmizin 44 günlük Vətən müharibəsində möhtəşəm Qələbəsini xatırladıb. Həmin dövrdə  Azərbaycan xalqının dilindən və dinindən,etnik mənsubiyyətindən asılı olmayaraq, vahid məqsəd ətrafında sıx birləşdiyini diqqətə çatdırıb.

Daha sonra pravoslav və katolik kilsələrinin kahinləri, “Həyat sözü” kilsəsinin keşişi, müsəlman icmasının nümayəndələrinin təbrikləri səslənib.

Bayram tədbiri bədii hissə ilə davam edib.