Xəbərlər / 17.03.2022 / 12:36

Martın 16-da Dini Qurumlarla İş üzrə Dövlət Komitəsinin (DQİDK) Ucar bölgəsi üzrə şöbəsi, Kürdəmir rayon İcra Hakimiyyəti və Yeni Azərbaycan Partiyası (YAP) Kürdəmir rayon təşkilatının birgə təşkilatçılığı ilə "Heydər Əliyev və milli-mənəvi dəyərlərimiz" mövzusunda tədbir keçirilib.

YAP-ın Kürdəmir rayon təşkilatının qərargahında keçirilən tədbirdə əvvəlcə Ümummilli Lider Heydər Əliyevin əziz xatirəsi dərin ehtiramla yad edilib.

Çıxışlar zamanı qeyd olunub ki, milli dəyərlərimizin Azərbaycan xalqının formalaşmasına təsiri böyük olduğu kimi, milli dövlətçiliyimizin möhkəmləndirilməsində də xüsusi rolu vardır. Milli dəyərlərimizin qorunması və inkişafı məhz Ümummilli Lider Heydər Əliyevin adı ilə bağlıdır. Ulu Öndərin milli-mənəvi dəyərlərə münasibəti onun yaradıcısı olduğu azərbaycançılıq ideologiyasının mühüm tərkib hissəsidir. Hər bir məsələdə Heydər Əliyev ideyalarını meyar kimi görən Prezident İlham Əliyevin milli dəyərlərin qorunması, inkişaf etdirilərək gələcək nəsillərə çatdırılması ilə bağlı siyasəti də bu baxımdan çağdaş dövrün reallıqları ilə şərtlənir. Mənəvi dəyərlərimizin, tolerantlıq ənənələrinin təbliğində, irsimizin tanıdılmasında, həmçinin dünyanın müxtəlif guşələrində əyani şəkildə nümayişində Heydər Əliyev Fondunun məxsusi xidmətləri də iştirakçıların diqqətinə çatdırılıb.