Dini Qurumlarla İş üzrə Dövlət Komitəsində 2013-cü ildə dini fəaliyyət sahəsində həyata keçirilmiş tədbirlərin yekunu ilə bağlı iclas keçirilmişdir (FOTO)

Xəbərlər / 14.02.2014 / 16:28

Bu gün Dini Qurumlarla İş üzrə Dövlət Komitəsində 2013-cü ildə dini fəaliyyət sahəsində həyata keçirilmiş tədbirlərin yekunu ilə bağlı iclas keçirilmişdir. Çıxış edən DQİDK sədri Elşad İskəndərov bildirmişdir ki, Azərbaycan Resublikasının Prezidenti cənab İlham Əliyevin ardıcıl və məqsədyönlü siyasəti, milli-mənəvi dəyərlərimizə yüksək səviyyədə qayğısı ilə din-dövlət münasibətləri sahəsində qarşıya qoyulmuş məqsədlərin reallaşdırılması üçün geniş imkanlar yaradır. “Ölkə Prezidentinin qayğısı ilə 2013-cü ildə həyata keçirilmiş çoxsaylı tədbilər bunun bariz nümunəsidir. Belə ki, ötən il əsaslı bərpa və yenidənqurumadan sonra Sumqayıt və Şamaxı Cümə məscidlərinin istifadəyə verilməsi, Qəbələ şəhərində Yeni Məscid kompleksinin açılışı, Heydər Əliyev Fondu tərəfindən Xəzər rayonu, Binə qəsəbəsi İmam Rza məscidininin əsaslı təmir olunması, eləcə də Bakı və Azərbaycan Yeparxiyasının Pravoslav Dini-Mədəniyyət Mərkəzinin açılışı din sahəsində əlamətdar tarixi hadisəyə çevrilmişdir.”    
 
E. İskəndərov qeyd etmişdir ki, ölkə Prezidentinin müvafiq tapşırıq və sərəncamlarının icrası ilə bağlı DQİDK 2013-cü ildə din-dövlət münasibətləri sahəsində icmalarla maarifləndirmə işi, dini qurumlarda olan problemlərin həlli, milli-mənəvi dəyərlərimizin inkişafı istiqamətində 150-dən artıq tədbir həyata keçirmişdir. Eyni zamanda insan hüquqları sahəsində 30-dan artıq tədbir təşkil edilmişdir.
 
Dövlət Komitəsinin sədri bildirmişdir ki, 2013-cü ildə 12 dini icma dövlət qeydiyyatına alınmış, bununla da dövlət qeydiyyatından keçmiş dini qurumların ümumi sayı 588-ə çatmışdır. Həmçinin, 688 adda dini məzmunlu ədəbiyyata baxılaraq, dini dözümsüzlüyü, ayrı-seçkiliyi və radikallığı təbliğ edən 29 adda kitabın ölkəyə idxalı məqsədəuyğun sayılmamışdır. Ölkədə çap olunmaq məqsədilə ekspertizaya 209 adda dini ədəbiyyat təqdim olunmuş, onlardan 4-də dini dözümsüzlüyü təbliğ edən fikirlər olduğundan çapına razılıq verilməmişdir.
 
Dindarlar arasında vətənpərvərlik və dövlətçilik ruhunun gücləndirilməsi məqsədilə bir sıra uğurlu tədbirlər barədə danışan Dövlət Komitəsinin sədri qeyd etmişdir ki,  Ümummilli Lider Heydər Əliyevin 90 illik yubileyi ilə əlaqədar “Dini dözümlülük və tolerantlıq Azərbaycan milli kimliyinin ayrılmaz hissəsi kimi” mövzusunda jurnalistlər arasında məqalə müsabiqəsi, “Keçmişdən gələcəyə: milli-mənəvi dəyərlərimizin qorunması” mövzusunda respublika konfransı, müxtəlif konfessiyalara mənsub dini icmalar arasında ölkədə ilk dəfə Tolerantlıq Kuboku uğrunda mini futbol turniri, müxtəlif konfessiyalara (müsəlman, yəhudi, xristian) mənsub dini icmaların iştirakı ilə "Yaşıl dünyamızı birgə qoruyaq" adlı ağacəkmə aksiyası keçirilmişdir.
 
Dini maarifləndirmə işinin gücləndirilməsi məqsədilə respublikanın Cənub, Şirvan, Şimal, Qarabağ, Sumqayıt-Abşeron və Qərb bölgələrində fəaliyyət göstərən dini icma sədrləri, din xadimləri, ilahiyyatçılar, həmçinin, ictimaiyyətin fəalları üçün “Dövlət-din münasibətləri və maarifləndirmə işi” mövzusunda keçirilmiş regional konfranslar barədə məlumat verən E. İskəndərov qeyd etmişdir ki, həmin konfransların yekunu olaraq 2 oktyabr 2013-cü ildə Bakıda “Dövlət-din münasibətləri və maarifləndirmə işi” mövzusunda respublika konfransı təşkil edilmişdir. İlk dəfə olaraq 40-dan çox dini icma  “Dini icmaların sosial layihələrinə dəstək proqramı” na cəlb edilmişdir.
 
Dövlət Komitəsinin sədri bildirmişdir ki, DQİDK tərəfindən yaradılan Milli Tolerantlıq Mərkəzinin beynəlxalq təqdimat mərasimi II Ümumdünya Mədəniyyətlərarası Dialoq Forumu çərçivəsində keçirilmişdir. Həmçinin, Dövlət Komitəsinin bilavasitə təşkilatçılığı və dəstəyi ilə BMT, UNESCO və Avropa Parlamentinin mənzil-qərargahları da daxil olmaqla Azərbaycanda dini tolerantlığı əks etdirən beynəlxalq foto-sərgilər və konfranslar təşkil olunmuş, “Azərbaycan İslam incisi” layihəsi həyata keçirilmişdir. 

2014-cü il üçün DQİDK-nın əsas  fəaliyyət istiqamətləri barədə
məlumat verən Elşad İskəndərov qeyd etmişdir ki, Dövlət Komitəsi  əsasən din-dövlət münasibətlərinin tənzimlənməsi və bundan irəli gələn fəaliyyətin təkmilləşdirilməsi, radikal və dini nifrət yayan cərəyanlara qarşı müvafiq tədbirlərin həyata keçirilməsi, dini icmalar və cəmiyyətdə milli-mənəvi dəyərlərimizin təbliği istiqamətində maarifləndirmə işinin gücləndirilməsi, tolerantlıq ənənələrinin gücləndirilməsi eləcə də daxildə və xaricdə təbliğatı,  milli-mənəvi dəyərlərin gücləndirilməsi və inkişaf etdirilməsi, dini icmaların cəmiyyətə inteqrasiyasının təmin edilməsi məsələlərinə xüsusi önəm verəcək.
 
 E.İskəndərov tədbirdə həmçinin DQİDK-nın loqosunun təsis edildiyini bildirib. Tədbirdə həmin loqonun təqdimatı da keçirilmişdir.  Loqo səkkizguşəli ulduz formasındadır. Ulduzun içində Azərbaycan Respublikasının Dövlət gerbinin elementi olan dua şəklində açılmış iki əllə əhatə olunmuş alov şəkli yer alıb. Həmçinin səkkiz guşə ni birləşdirən elementlər Azərbaycanda dini tolerantlığı və dinlər arasındakı münasibətlərin çoxşaxəliliyini göstərir.
 
Qeyd edək ki, iclasda çıxış edən Qafqaz Müsəlmanları İdarəsinin sədri Şeyxulislam Allahşükür Paşazadə, Rus Pravoslav kilsəsinin Bakı və Azərbaycan Yeparxiyasının rəhbəri Aleksandr İşein və digər dini icma rəhbərləri Dövlət Komitəsinin ötən il gördüyü işləri yüksək qiymətləndirmişlər. Həmçinin, bildirilib ki, Dövlət Komitəsinin fəaliyyəti nəticəsində Azərbaycanda dövlət-din münasibətləri sahəsində ciddi irəliləyişlər əldə edilmişdir.
 
 
DQİDK-nın mətbuat xidməti


Son baxılan xəbərlər

Gündüz İsmayılov: “Burada əsas məqsəd İslam dini pərdəsi altında insanların inancından sui-istifadə etmək, dindarları ...

Açıqlama
01.08.2018 / 14:39
Ətraflı oxu

Dini Qurumlarla İş üzrə Dövlət Komitəsinin Mətbuat Xidmətinin məlumatı

Xəbərlər
30.07.2020 / 16:19
Ətraflı oxu

Heydər Əliyev və milli-mənəvi dəyərlərimiz

Xəbərlər
30.04.2018 / 14:39
Ətraflı oxu

“İslam həmrəyliyinin təbliğində məzhəblərarası dialoq” mövzusunda tədbir keçirilib

Press-relizlər
22.02.2018 / 16:10
Ətraflı oxu

Şirvanda maarifləndirmə tədbiri təşkil olunub

Press-relizlər
14.03.2018 / 17:20
Ətraflı oxu

Səyyad Salahlı: “Din xadimləri ictimai həyatda fəallıq nümayiş etdirməlidirlər”

Press-relizlər
22.11.2019 / 11:08
Ətraflı oxu